8. komunikatua (2003-06-18) Erresistentziako 3. eguna Itoitzen
Itoitzekiko Elkartasuna taldeko bitartekariak herritik are gehiago
urrutiratu zituzten bart gauerdian. Garai batean harria txikitzeko erabiltzen
zen oruberaino joanarazi zituzten, herritik 500 bat metrora. Guardia
Zibilak, GAR taldeek eta Foruzaingoak ez dute atsedenik hartu gau osoan:
Itoitz erabat inguratuta eta kontrolpean izan dute. Herriaren inguruan
plastikozko zinta bat jarri dute, eta kazetariei ere ez diete utzi barruan
sartzen. Ondorioz, hirugarren erresistentzia egun honetan ezin izan
da inor hurbildu Jakue eta Bernatena etxeetara.
Bitartekariak beste ahalegin bat egin dute, baina berriro kanporatu
dituzte. Azkenean Alduntzako gainean gelditu behar izan dute, Itoitz
herritik pare bat kilometrora. Handik ezin zuten ikusi zer gertatzen
ari zen herrian. Bistan dago horixe izan dela hasiera-hasieratik polizi
indarren helburua: lekuko guztiak kanporatzea, inork ikus ez zedin zer
egiten ari ziren foruzainak. Foruzaingoaren jokaera beldurgarria bezain
arriskutsua izan baita: Bernatena etxeko bunkerra mailu neumatiko batekin
zulatzen saiatu dira, barruan zeuden lagunak ateratzeko asmoz. Hori
ikusirik, ekintzaileek suhiltzaileen eskuhartzea eskatu dute, nahiz
eta animoz eta osasunez ongi dauden, oraindik zenbait egunez jarraitzeko
moduan.
Bunkerrean kateatuta dauden bi lagunen bizia arriskuan zegoela ikustean,
Itoitzekiko Elkartasuna taldeak prentsaurreko bat eskaini du Alduntza
gainean gizarteari SOS deia egiteko. Prentsaurreko horretan gaur goizean
Itoizko etxeetatik beren kabuz atera diren bi ekintzaile mintzatu dira.
Bi lagun horiek kinka larrian ikusi dute euren burua, eta artean barruan
gelditzen ziren beste hiru pertsonen bizia arriskuan egon zitekeela
ohartarazteko atera dira. Komunikabideen aurrean, gogor salatu dute
Foruzaingoaren eta "Perez del Rio" enpresa txikitzailearen
basakeria; izan ere, makina astunak erabili dituzte hormak botatzeko,
kontuan hartu gabe handik oso gertu jendea zegoela loturik eta mugitu
ezinik.
Agerraldi berean, bunkerrean gorderik segitzen duten bi ekintzaileak
inolako babesik gabe gelditu direla eta haiek kanporatzen saiatzea oso
arriskutsua dela ohartarazi dute Itoitzekiko Elkartasuna taldeko bitartekariek.
Prentsaurrekoa ematen ari ziren bitartean, Guardia Zibilak erabat inguratu
du Agoizko Angiluerreka elkartea, eta plazan zeuden zeinbat lagun identifikatu
ditu.
Ordu berean, bere etxean ezkutaturik zegoen Itoizko biztanle bat aurkitu
du Foruzaingoak. Foruzainek bortxa handiz atxilotu dute eta ondoren
komisaldegira eraman dute. Hala ere, Foruzaingoko zenbait arduradunek
ukatu egin dute ekintzaile hori preso hartu dutela.
Gertaera hauek guztiak direla eta, Itoitzekiko Elkartasuna taldeak protesta
zaratatsua egingo du gaur, arratsaldeko 8etan, Agoitzen.
Informazio ematen jarraituko dugu
OHARRA: Hemendik aurrera gure komunikatuak hurrengo helbideen bitartez
banatuko ditugu soilik: www.sositoiz.com eta www.euskalherria.indymedia.org
Atxilotuak askatu! Itoiz bizirik! Amalurra defenda dezagun!!! Itoizko
Solidarioak