Berria. Erredakzioa. Baiona

AHT abiadura handiko trena nahi duten edo ez esateko aukera izango dute gaur Lapurdiko Mugerre, Lehuntze eta Hiriburun. AHTaren aurkako herri ekimenek antolatuta, egitasmoaren inguruko herri galdeketak izango dira. Lapurdin AHTaren ibilbidearen ikerketak bertan behera geratu diren aste berean egingo dituzte herri galdeketak hiru herrietan.

Michelle Alliot-Mariek, Frantziako Barne ministroak, asteon iragarri du bertan behera utzi dituztela Baiona eta Hendaia arteko AHTaren bideragarritasunaren inguruko ikerketak. Aurkako ahotsak izan dituen arren, erabakia berretsi egin du, geroztik, Alliot-Mariek. Espainiako Gobernuak kezka agertu du bertan behera uztearen inguruan, eta iragarri du kontuak eskatuko dizkiola Frantziako Gobernuari.