Lehen sektoreak jasaten duen bazterketa salatu nahi izan dute sindikatuko kideek. Abiadura Handiko Trenak eragingo dituen kalteak salatu zituen EHNE sindikatuak atzo, Urbinan.

GARA. URBINA

«Pentsa maldarik gabeko lur-eremu honetan 80 metroko zabalera behar badu AHTk, zer-nolakoa behar duen Gipuzkoan, Bizkaian eta Arabako eta Nafarroako mendialdean», adierazi zuen sindikatuak. Taldeak gogorarazi zuenez, behin eta berriz salatu izan dituzte proiektuak lurralde antolaketan, nekazaritzan eta ingurumenean eragingo dituen ondorio kaltegarriak.

«Nola lortu garapen iraunkorra?»

Era berean, lehen sektoreak jasaten duen bazterketa salatu zuen. «Garapen iraunkorraz hitz egin besterik egiten ez duten agintariek nola pentsatzen dute asmo hori errealitate bilakatzea, sektoreen arteko orekarik gabe?», galdegin zuten.

Sindikatuak gogora ekarri zuenez, baserri mundua ondare kulturala baino zerbait gehiago da eta ekonomiaren oinarri bat baino zerbait gehiago; «herri baten etorkizuna baldintza dezakeen sektorea» da harena. Era berean, honako hau gehitu zuten EHNEko kideek: «Oraingoz agintariek gai honi kasurik egin nahi ez badiote ere, gizarteak pixkanaka hausnarketa hori barneratu beharra dauka; bertako produkturik gabeko Euskal Herria nahi ez badu, behintzat».